CTC atum pen Tika Youth aTheme aphuthak lam lapen Lun jume kaparju

Lam Kethan abangphu Merang sanglir, Clark Theological College along BD, lo-kacharli abangphu. (Lamlar Ketok dunthu Thare Lumtaso Ingti Kathar, BD, UBS)

Lamphrang: Aphrangsi Khristo aphan kroiraprap akorte lapen Ingjir atum an aphan aKardom pajirlo. Neli ning-arong'o lake esi ahirjume pen apotsi Tika Baptist Church Youth Department atum along lam kethan long. Nanglitum pining ningkan 2020 kangvai aTheme/aThepi ne karjulong pen ning chehok'olo lake mepik anparta akenangsot lo etum Youth Department aphan. 

Non kangdangbom Covid-19 pandemic avur-akrem Monit kangthim akethek-kere ajakong-horang ko'an doloma epeklangdaklo lapen non etum chini pemelo monit atum khang-un'e lapen chohai un'e pu.

Lason avur-akrem ahut etum akeme kadokave atum aphan mate bang anut kaprek aphan akeme keklem akenangsot. Akeme keklem lake monit amek angno akeme pu kedengme asai chot aphan kali, bonsetame Arnam amek angno akechok'lim akeme asai aphan si akeme pu kehokdam. Labangso kejongdam alamthe 'Keme' pu aphan henlo etum anut kaprek aphan keklem pinangji.

Nelitum Tika Hills arong chuning hadak Holistic Ministry aphan vanglo lapen nelitum theklonglo haladak arong along aningkethe kavepin pu atum ave, bonsitame pirthe akeduk keboi lake nelitum hadak kedo'un ahut penang'an theklonglo. Lasi alanglitum aphan asonson etum ningchebira matha ponver pen akeme keklem nangji lake akenangsot lo.

Laso kedobom avur-akrem kangdang ponchot ahut etum theklonglo lake esi pangbar ponme alam puta hok pon melo. Chennai along Mizo akhei enut ariso ,Vivian pu amen, kethi abang arpum kelonglok ajoine api-apo Mizoram an Chennai pen kepon detji aphan choningrilo. Labangso kethi abang arpum Private Ambulance pen kepon lake S Chinnathambi pen P Jayendran, lapen Vivian ajirpo Raphael Malchhanhima la bang-hini atum along dunlo. Labangso hem konglong Chennai pen Mizoram an kapaleji aphan Ni-phli lapen Suri-Kethom Kilometers an ajak kedingpi vek pon detlo S Chinnathambi lapen P Jayendran atum banghini si. 

Lasi etum akeme kadokave/Bang atum aphan apor kelong aling keklempi lake akenangsot the'o binong asai lo.

Lapen akeme keklem along Reconciliation, hotur angbong kahingno ason pen kachelakha atum kachepate lapen ningkeme pen kacherapthu akenangsot binong pima neli chuning Christmas ahut Jon 3:16 pen kethan ason etum monit pap ajoine Arnam pen chehelongving apot Arnam along eKevanthuji aphan Arnam aSopo epumpet Jisu epi det lo lapen Alang apran chepidetlo. Lasi ening chematha damthu sinang akeme keklem aphan Arnam ekepi akanghon Jisu aphan deng pen, lapen Jisu pen chelang raprap pen ajok akeme kadokave mate anut kaprek aphan elitum klem lonang.

Birta Keme Kevan abangphu Merang Sanglir, adunthu Lunjume akaparjuji abangphu Lanuwapang, adunthu alanglitum ajirpo banghini atum pen Lunjume, lapen banghini alanglitum ajirpo-ajirpi atum pen lun jume eparjuponjisi chethek'lo.