Ador Keso Kanempru Ajangthu apar Ador Kesonai

Ador Keso Kanempru Ajangthu apar Ador Kesonai 

Ningkan Surihini-ra-kre-nerkep Jangmi achiklo niphai phli arni enut cancer akeso ajoine se chelangbom pinso oso ningkan throk arta lapen lo-kacharli angdeng hini, labangso a-oso akai aphan kemang ateng kapaplengpiji pusi Make a Wish Foundation ahemphang atum pen arnisi aphan Police Commisioner peman pon tekang longlo. Make a Wish Foundation atum Telengana along Rachakonda Police Commissioner Mahesh Muralidhar Bhagwat IPS along chetong damsi labangso ningkan throk blood cancer kelong a-oso Dudekala Ishan aphan arnisi Police Commissioner kapemanji aphan choningrilo, laso ajok Mahesh Muralidhar Bhagwat Police commissioner anghoi pen che’osi arnisi aphan Dudekala Ishan aphan pek detlo. Labangso IPS officer Social Media along mohor kapeklang pon ateng kethek ponlong ke Dudekala Ishan aphan Police Commissioner kachingthan apindeng aperi si pachingthanglo lapen anut kaprek police atum ta adung arjap dunher si kangnek araje chepeklang dunlo. Dudekala Ishan akai kemang ateng pen arnisi aphan Rachakonda Police Commissioner kapeman long ke esi thedung kapechun longlo pima alang achethe kerenglongjine mate laso apirthe pen che’o tekang nangjine puthekthe. Apotsi Dudekala Ishan ahem esi lapen ajirpo atum aphanta lake esi kemesen asimsap pusi chemathapon longpo.

Lason thakthak jongsi komatne kerengji aphan keso pen ajoine achethe asoi ave pule chini asonte etum seta kemesen asai dengponji mene. Seta Jisu ladak pirthe along ministry klem bom un ahut arisangho atum aphan alang thinangvekji pu chethan seta kamatha peplengdam un’e det mate chenidam un’e det ajoine Jisu kethi ahut arisangho atum anta pratjam lapen adung do dunde detlo. Mathui along ketok pon ateng alo-thui le lang ponlo te Passover Jihudi rat amei arnisi pangchengche aphrang Jisu Bethany arongsopi along Simon pu si’i kelong abang ahem dodamlo lapen Alang ankecho ahut eson kemesen asai thekponlonglo – “inut arloso ador kesopik ajangthu nempru Alabastar pu a-arlong abong pen vansi alangli long vang-lo, lapen labangpi alangli phuthak la dungjirlo” (26:7). Setame Jisu arisangho atum, angdengso nerkep pen sirkep (angdengso 8-9) along thekpon longji, labangso arloso keklem pon aphuthak aningkachekroidunde chepaklanglo. Bonsetame Jisu labangso arloso keklem aphuthak aningkachingsam thekponlonglo pima lason si pulo, “Pima alangli la kenempru ajangthu nebang athak kedung pen ajok nephan kepipji aphan sik tang-lo” (angdengso 12). Labangso arloso Jisu aphu athak dung tangdet aphi ansi Jisu thinangji pu chechar damlo seta lason adorkesopik kanempru ajanthu Jisu aphu athak kedung lake Mathew Henry’s Concise Commentary along ketok ateng pulote Manpeng kethenai aphan si dung chot. Lasi labangso arloso keklem pon lake Make a Wish Foundation atum keklem ason kalidetji mene seta Jisu thithe aphrang esi ador keso asimbon kapajir asonsi mandetlo. Apotsi arisangho atum aphan Jisu thanthulo, “Chenamsi ne nangtum aphan nangpulang, pirthe adang labangso abirta keme kepachethang adim aling labangpi aphan kechemathathu-ji aphan la alangli keklemtang akamta thandetji” (angdengso 13). Labangso angdengso pen peklanglo Jisu ko’an aning ingsamlo ma mate ko’an aningplenglo ma labangpi esi asimbon kapajir ason ador keso kanempru ajangthu kedung kemesen asimsap pu hokpon det asonsi mo nonphi antame laso arloso kekklem alammo doverji.   

Jisu Gethsemane along Po Arnam aphan cho’ardom tangdet pen alangphan nep pon tanglo lapen aphi thi nanglo. Jisu kethi lake etum apap kedo ajoinesi etum alar Alangsi apran chepidet lo. Pini kopisi Jisu etum along pen kenangji lake ador keso kanempru ajangthu kali bonsita ne chethe lapen nang chethe (life) si Alang kenangji. Jisu aphan etum chohodai detsi etum achethe (heart, mind, soul) ador keso ajangthu kanempru ason ansose chohodai pon bom lonang.

Karsikjik pen emethang kacharju nangji alam:

Judas ason etum apar Jisu along kachelangdun ver lapen mek’renglor pen hakhi kelong dun abang Jisu aphan panungkuk’si kaprek pirthe akhi aphan patherongji ma. Mate Mathui 26: 6-13 along a-arloso ason ador keso kanempru ajangthu chepi detji ma.