Meri Megdela, lapen Banghini Emmaus Arong Kedam atum

Meri Megdela, lapen Banghini Emmaus Arong Kedam atum 
Tika Youth Department
Niphai: Jangmi Krekethom, 2020 

Monit araje kachinglit ke'ong ajok penang'an ajirkeding aphi pen kachetongthulong ajirpo-jirpi aphan kachingkiji sangrem mate ingkihaihe det lapuson ta kepho do pima kachinivek abang kalidet mene pu akamatha kedokok ajoine. Jongsi konatne ajirdingklui aphi pen kachetong jirpo mate jirpi banghini atum angbong pen enut ma enut le anut kaprek abang aphan chingki paphrangphre pulotangte lahin lahin chingkike detji lapen jongsi enut bak chingki paphrang lote anut kaprek abang seta kai kachingki kachethan ason chethek longsi chechinithu pemeji.

Lason thakthaksi Baibel Kachejok Aloh Kimi alongta Kachichini abang aphan aphi koson pen tongne lapen kopi apot'lo ne, seta chinithuthedet lason do.

Mary Magdalene mate Megdela a-Meri Jisu thithe aphrang birta keme kedeng tang abangpi lapen Jisu arisangho jokjak atum along kacherap kacheto aphan kedun abang (Luk 8:1-3) kethurtang aJisu aphan thek'long sita chenine detlo. Halaso ahut Jisu aphan kepip atipit adungsi bhomkuru adap prinprele apor ahut arjapther si Jisu dolo lapen Megdela a-Meri aphan kachingkithu ansi labangpi chinithu pemelo. Lasi— Jisu alangliphan arjulo, “Nangli kopi athesi kechiruma, pei? Nangli komat aphansi kerima?” Labangpi alangliphan paiberi arlo ketiki abangsi tinkok-lo. Lasi labangpi alangliphan pulo, “Jongsi nanglisi alangliphan terek ponlo tangte nangli alangliphan konatsi kebidamma, ne-thantha. Neli alangliphan endampo.” Jisu alangliphan pulo, “Meri!” Labangpi alanglinat chetevarsi Ibri alam pen pulo, “Rabboni!” (Labangso alam atheke “Kuru” pu helo) JON 20:15‭-‬16. Jisu thurdet aphi Megdala a-Meri Alangphan chenithuthe det bonseta "Meri" pu amen kehang pen matmat labangpi lahenlo Jisu pu chechinithu pemelo, pima Jisu labangpi pen Jon throk'si akarjonglangno pebarlo lapen penang akeso kedo pen pejok'lo (Luk 8:2). Lasi Jisu abirta keme lapen Jisu aphan kekroi pen kedeng peme apotsi Jisu aphan chini peme.

Kethek longcheng pen kethurtang aJisu aphan kachinine dothulang lake banghini amonit atum Jisu-arisangho bang kre-esi along kachelang dun atum henlo Luk kapangchap alo-thui along kethap pon (Luk angdengpi Ingkoi-ra-phli, 24, labangso angdengpi lake Lukan kapangchap pon alo).

Jerusalem pen kilomitar kre-esi anbak kahelo Emmaus pu arong anathu dam bom ahut Jisu la banghini atum along patebok dunsi damrappet lo lapen "halatum alangliphan thek long-lo, bonta kopuson lone alangliphan chinine det-lo" (LUK 24:16). Lasonsi Jisu la banghini atum pen kachingki panchenglo lapen hastro alam penta thanlo (kelang pon Luk 24: 25-27). Lapen latum an kechoji aphan ingnilo, Jisu "him ensi ahirjume hang-lo lapen ke him bengsi halatum aphan pilo. Anke halatum amek ingpudet-lo lapen halatum alangliphan chininedet-lo, bonta alangli halatum amek angden pen chepavedet-lo" (LUK 24:30‭-‬31). Ansi la banghini atum laso ajo amat Jerusalem chevoithuphit si arisangho lapen kerap dun atum pen pen kachethan "Ahok-lo, Hemphu thurtang-lo! Alangli Simon aphan cheklang-lo!” (Luk 24:34) pu ta arju dunthu longlo.

Labangso alamjir son-ni ta kachinglit dam ke Meri Jisu aphan chinine aphrang aningke'oi si do apotsi Arnam Apherangke atum arjulo, “Nangli kopi athesi kechiruma, pei?” (Jon 20:13), lapen Emmaus arong kedam banghini atumta aning ke'oi si do "Halatum sangkoksi amahang jang ik-ak-lo" (Luk 24:17). Bonsita Jisu aphan kachini pen matmat Meri "Hemphu aphan thek-long-lo pusi sangho atum aphan thandamlo" (Jon 20:18), lapen Emmaus banghini kedam atumta ningkangsam longlo pima latum risangho lapen hadak kedo atum an penpen Hemphu kacheklang alam thanbom ahut Jisu arjapther si halatum aphan pulo, “Nangtum along ning kangsam padonang!” (Luk 24: 36).

Jisu thithe aphrang penta arisangho atum aphan chethanlo “Monit a-Sopo aphan monit arideng hodaidetji, lapen halatum alangliphan pathilotji, bonta nithom aphi alangli rengthusi thurji" (MATHIU 17:23; Mark 9:31) pu alam thanlo, lapen Alang thurdet aphi ta Emmaus kedam atum aphanta thanthulo, "Khristo lahei hei akesung chechakdet aphisi alangli adak atur angbong kelut damji a-ot dolo, kalima?” (LUK 24:26). Jisu chini peme Alang thinangji pu lapen lpaso aphansi pirthe vanglo atheke Alangphan Cross along kapathi ahut si Po Arnam aningkehang ateng pen peplengsi "La Choktang-lo"/"It is Finished" pu ningjelo(John 19:30). Cross along kethi henlo pap keklemkle pin kangthir'et Arnam— Jesus Khristo etum monit atum ason cheplang dunsi Pap aphan pavirlo, lapen thiri pen kethur henlo kethi pen kejok ajakong mate kethi kapavir lo.

Oswald Chambers tok'lo, "Our Lord’s Cross is the gateway into His life: His Resurrection means that He has power now to convey His life to me. . . Our Lord’s Resurrection destiny is to bring “many sons unto glory.” The fulfilling of His destiny gives Him the right to make us sons and daughters of God."

Lasi matne eli kachichini ajirpo jirpi aphan arjidingklui aphi kachetongthulong pen eningkarong ason, Jisu aphan eli chini pememe tahai seta Alang elitum aphan echeklangthuji aphan ening anghap ebechengverlo. Jongsi ingpudang pen Alangphan denglo tangte Jisu aphan cheni peme longji. Anchot kali chethe kimi ta epithuji.



Tokbang: Lumtaso Ingti Kathar, BD (Union Biblical Seminary, Pune)
Tika Hills, West Karbi Anglong