Bible Study: Psalms 2 (Lun Hini)

Tika Youth Department WhatsApp Group Short Bible Study on Psalms 2 (Lun Hini).

Lun Hini kaporhe kangchap alo along bangphli amonit atum aphuthak David ekethan kapajir alamthe thek'longji:

1. Pirthe aRecho lapen la amonit atum kachepinkhat alamthe: 

Lun Hini alo along David karju alamthe theklonglo kopi apotsi pirthe detpikethe atum bidi langno pen chepinkhat nak'lo ma. Pirthe arecho keja atum Hemphu Arnam aphan lapen Alang kangvaitang aphan bidi kahingno pen kapavirji aphan lahin lahin chingvailo. 

2. Hemphu Arnam kethakdun alamthe:

Bonta sining angsong anghoi pen la ardikave akemang aphuthak Hemphu Arnam latum aphan ingnekchoilo. Anparke aningkethi pen pirthe arecho keja atum aphan an pacheretoi si thanpo ne kangvaitang lapen kepektang arecho Zion inglongkangthir along si do pu. 

3. David Recho amethang kachethan alamthe:

Hemphu Arnam nephan kethan alam kopima lasi ne than po. Nephan Hemphu Arnam asolo pusi nepeplanglo apotsi Alangliphan hanglote detpikethe anta nephan hodaidetji lapen nephan pacheraidetji. Lapen ne kapangjeji lapen kahijikji ajakong nephan hodaidetpo. 

4. Pirthe keja Recho atum aphan an David Recho Arnam kangvaitang abang thanpare alamthe kapajir: 

Lasi David Recho Arnam kangvaitang abang, pirthe arecho keja atum aphan an thanpare alam pensi parelo. Arnam kopisi alanglitum aphuthak klemjima la cheretu, apotsi akeme kachini pen reset nangji. Arnam aphan kaphere pen aningkedok asai keklempi pen ingduk nangji. Kalite Hemphu Arnam aningkethidapprang ajoine pen virdetji. 

Ahirjume kedeng pen aningkachehok atum an Hemphu Arnam along kachepachongdam atum an rengme (ahok akerengme longji).

Kachethan kachemum seroi nangji: 

1. Non akai arni det keja lapen longri longpat keja kethe keding atum kadokave aphan kemesen ale kedo asai keklem lake Hemphu Arnam aningkedok asai lo, apotsi la keklempi ke Arnam aphan kaphere mate manpeng kepi loma mate la kemesen keklem pensi Alangliphan kangduk ason thekdam longma?

2. Rat-chari, rongrup lapen mondoli arlo keja arpu kedo atum an Hemphu Arnam aphan manpeng kepi pen kachematha lapen kachinghon ajok saikeklempi pen elitum ingduk'lo ma?