Bible Study: Lun Pharo-esi-ra-Phokep (Psalms 150)

Tika Youth Department WhatsApp Group Bible Study 

Thihek pen Aruivang Lun Alo-thui along pen Baibel Study. 

Lun 150 Ingdeng phli an thakponme: 

1. komat aphansi kero karcho (Angdengso Esi).

2. Komat atum lapen kopi apotsi kero karcho (Angsengso Esi pen Hini).

3. Koson (a-ot) pen si Kero Karcho nangji (Angdengso Kethom pen Pho).

4. Komat aphansi Kero Karcho nangji (Angdengso Throk).

Lun Pharo-esi-ra-phokep:

#Angdengso Esi lake Hemphu aphan kero karchoji aphan ekepha, adim longni jongponlo— Kardomhempthepi lapen Sining angsong along (English Bible). Arnam amethang ajakong pensi Sining pinchonglo lapen monit atum kedo an ason pen kerengmesenji aphan ladak pirthe along epilo lapen pinchonglo. 

#Angdengso Hini kejongdam lake Arnam ajakong ko'an kethe, Sining lapen kemesen ason an monit atum aphan ladak pirthe along kethippi laso aphansi pu dam lo, "Alangli thedung akam keklem apot Alangliphan ronon! Alangli kethepik apot ronon!" Lasi sining lapen pirthe keroraprapji aphansi ethanlo, monit pen Arnam apherangke. 

#Angdengso Kethom pen Pho kepudam lake ning aklong pen Arnam aphan kero-karcho-aning ajakong do'an pen ronon pulo, lapen la kero karcho kapangtuiji aphan lamthe penchot lapu kali sita Pong-ut, Kumbeleng, Kumbeleng-chongdeng, Pongsi lapen Prakso ase haihui pensi kero-karcho ase pangtui nangji pulo. 

#Angdengso Throk alongke Kereng'et kapinchongtang amar an Hemphu aphan ronin pusi kepha alamthe pensi pejutlo kopi apot pulotangte Arnam Sining angsong kethip kapingchong ajakong pensi pirthe tame kemesen ason an pen monit atum aphan pinchongpilo. Lasi Lun Pharo-esi-ra-phokep angdengso esi along "Hemphu aphan ronon" pu alamthe pensi angdengso throk along pejutlo. 

Arnam sining kethip ajakong pensi ladak pirthe ta kemesen ason an pen monit atum aphan kaparengmesenji aphan lasonsi thik'et tanglo, lapen lason thakthaksi Arnam aning kemesen asonthotsi etum monit aphanta e'inghinlo. Lahenlo Arnam aning ke kaita mesen lapen chingkimesen. Apotsi enut a commentator Walter Brueggermann kepu asonsi Old Testament aron (Torah) karju lapen kerim aphanchot (obedience) kali bonta Arnam aphan kekroi pen ning kacheparong'i aphan si Aron alamjir (Torah) porhe nangji pusi pu. 

Non Covid-19 pandemic ahut kosonsi etum Arnam ajakong lapen aning kachini ponbom thekji? Arnam alam kaporhe, lapen kardom pen henlo atovar ke.

Lasi non kachere lapen kesung kepho apor ahut tame Arnam aphan kekroi, Alangli ning lapen ajakong along etum kachiki dam pen ro'archoverji aphan le ningchebiver pen charlilonang. Kum pensitame apor kedo aling Arnam aphan ro'archo lonang pima Arnam ke kaita chingkimesen.