Ning arong Po arni aKardom pajirlo

Po aKanghon 

David arni ahut alang Arnam aphan river lapen Israel aRecho alangphan bat tangdet pen ahotur do'an pen pejoksi kesangbom ahut Nathan Montri pen ajok Arnam asemeh David aphan pajirlo. Alamthe lahenlo David pirthe pen chevoi'et aphi asomar angbong pen enut aphan Recho paplangsi labang aphan Arnam apo ason chekampo "Ne ke la apo plangpo lapen la ke Nesopo plangpo. La keklem kechokche ahut, la aphan apo le asomar atum aphan aduk kepi asonthot aduk pipo" lapen Arnam akanghon do dunverpo (2 SAMUEL 7:14-15). Puthot Solomon ketok aSarlamthe along lapusi tok'lo "Sopo, nangphan Hemphu nangkepa-keng ahut nangno chedendun pamenon lapen la kepacherelo pura dengnon. Inut apo aningkechethe asopo aphan kepakeng asonthotsi Hemphu kechinghon abangphan alangli pakeng-lo" (SARLAMTHE 3:11‭-‬12). Lun 103:13 alongta pirthe kedo po a'arjan ensi Po Arnam aKanghon kedeng atum aphuthak alam lason si tok'lo, "Asomar aphan apo kechinghon asonsi, Hemphu aphan man kepi abangphan inghonlo." Apotsi Po Arnam le pirthe po a'arjan ke'en pen Alang aKanghon alam ekethanthu ke lahenlo pirthe kedo po atum asomar aphan kachinghon the'o, lapen hem along mate rongrup along sitame jakong do'an pen kemesenji aphan ke klemlo. 

Lasi etum methang apo aphan kachinghon lapen man-peng kepi ke akenangsotlo, anparta po alam karju ke kaita dengnangpo lapen mili nolo. Solomon kethanpare alamta lapusi pulo, "Sopo, nangphan nangpo kopima nangkethan le arjudunnon. Nangno cheden dunlote nang kechini longpo. " (SARLAMTHE 4:1‭).

Pini Po Arnam aphan lapen etum aphan ekepi dak pirthe aPo atum aphan an anong pathe lonang.

Konchunbang Thare Lumtaso Ingti Kathar

Tika Youth Department